مناقشة جزمة واحدة مليئة بالأحداث
يوم الاربعاء القادم.. يعني اللي جي
الساعة الخامسة .. يعني 5
بمكتبة مبارك.. ده مجرد اسم مجرد من أي دلالة.. مع السماح بالتأويل طبعا
ندوة حول المجموعة المسرحية جزمة واحدة مليئة بالاحداث .. ده اسمها يا حضرات
للكاتب باسم شرف .. اسمه أصلا باسم محمد شرف
وسيناقشها : الروائي والناقد طارق امام.. صاحب شريعة القط وحاصد عدد كبير من الجوائز
والشاعر والناقد تامر عبدالحميد.. الشاعر المذهل صاحب المناقب الشهيرة والكاب الصاعقة والسوالف الشارلستون
والدعوة عامة وده معناه انها هتبقى لمة .. يرجى مراجعة محمد فوزي
عنوان المكتبة.. شارع مراد.. بجوار مديرية أمن الجيزة وكمان بجوار الحزب الوطني كفانا الله وإياكم شر كل منهما على حدة وأعاذنا الله منهما مجتمعين
واحتمال كبير يكون في مثلجات ومرطبات لو كان الكشك فاتح
والعاقبة عندكم في المسرات
الحضور من غير الملابس.. الرسمية طبعا
كالعادة
هناك ١٦ تعليقًا:
ويعنى حضرتك دلوقتى دى حاجه سياسه ولا عادى ولا ايه بس عشان اعرف لو هاجى هنتقفش ولا الموضوع امان ...حاجه خطره ولا ايه؟؟؟
يا ستي مش سياسة ولا حاجة دي مجموعة مسرحية
بس المكان هو اللي ملبِّش شوية
يعني ما تخافيش مافيش حاجة هتحصل
دي المكتبة اسمها مكتبة مبارك
عايزه أمان غيه أكتر من كده
بس خلي بالك وهاتي المثلجات والمرطبات بتاعتك معاكي وما عنديش أي مانع انك تعزميني على بيبسي كانز وواحده هوهوز
:)
حلوة التقديمة جدااا
الاسم خالي من الدلالة متأكد؟ مجرد صدفة المكتبة بجوار مديرية الامن والحزب دي حاجة تقلق
قلتلي باسم انتماءاتة ايه؟
باسم انتماءاته كلها مسرحية
والمكتبة جنب الحزب الوطني ومديرية الأمن عشان تحصين الاسم فقط
وهو طبعا مخلي من الدلالة
وإلا لو كان اسم على مسمى كانت حاجات كتير اتغيرت
المهم انك تيجي بس وما تنسيش المثلجات والمرطبات بتوعك معاكي عشان ده هيبقى يوم عصيب جدا عصيب قصب
واعملي حسابي معاكي برضة
لأني غالبا على نهاية اليوم ناوي أفتح كشك
ازيك يا استاذى؟
جامدة التلبيشة دى فعلا
دى الدنيا حلوة هناك ونظيفة وسفارات وبتاع
والواحد كل يوم هناك ومافيش مشاكل يعنى
تحياتى
الصديقة أوريكا
يعني غيه الاسم ده؟
حضرتك نسيتي الحذاء بتاعك في الصورة وده معناه ان فيه مشكلة مضاعفة بالنسبالك لأنهم بيمسكوا أي حد رايح الندوة ومش لابس حاجة في رجليه
وعموما أنا شغلي في نفس المكان جنب سفارة إسرائيل وسفارة السعودية على طول لو انتي كل يوم هناك ابقي خلي بالك بقى لأني هاعرفك هاعرفك والانكار مش هيفيدك
بس ابقي خلي بالك عشان بيبقى في قزاز مرمي في الأرض
وأحيانا بيبقى في ألغام
ما تنسيش المثلجات والمرطبات
انا جاى بس اقولك متعملش حسابى
ما أعملش حسابك في إيه بالظبط
على العموم أهلا بيك
هشووفــــك هنااااااااااك أخييييرًا إن شاااااااء الله ، طبعًا هسألك على (سرداب طويل ) لأني عاوزها نسخـة مطبوعـة ، وقريت إنها هتنزل قريب ، وهيبقى معايا وقوف متكرر ، يمكن أكلمك عنها ، وهمشي على طوووول لأأني مش فاضي للأسـف !!!
.
.
.
وإيه كمان ؟؟؟ ، لأ .... بـــــس كفايةو كده
آه ، وهبارك لباسم ع الجزمة ....
آآآه أقول له مبارك ع الجزمة ( المليئة بالأحداث) يا باسم
ضحكتني جدا يا هيما
وسعيد جدا برؤيتك
وهجيبلك معايا نسخة من سرداب ورقية
وبارك يا سيدي براحتك لباسم
بس لغويا كلمة مبروك دي غلط
لأن مبروك هو اسم لابن الخروف
والصحيح لغويا برضه أن تقول مبارك بدلا من مبروك
يعني تقول لباسم
مبارك ع الجزمة
عموما نتقابل هناك بكرة
أضحــك الله سنينـك يا عم اتلروااائي إنتا ... يعني بالله عليـــك (مبروك) اسم ابن الخروف ـ لامؤاخذة ـ ومبارك ابن اسم الكـ..... ماااا علينا
أنا طبعًا هقول له مباااارك ع الجزمة ، لو تلاحظ أنا قايل كده أصلاً
.
.
والغريبة إننا × الوقت نفسـه هنتقابل إنهاردة
يا محاسن الحلو !!!
ماشي يا عم هيما
أنا في انتظارك وهو كمان
وامبارح قابلت في الجرنان واحد صاحبك أو جارك اللي هو طلال فيصل وبعتلك
السلام معاه
يا محمد يا صلاح يا عزب تقديمك لندوة باسم هايخلينى أعمل حاجة فى نهنوه واجى الندوة باى طريقة ، يابنى ايه اللى انت فيه دا مش عارفه جبت خفة الدم دى منين ... على العموم انا دلوقتى باطلع على جزء الرواية بتاعتك وهاقولك رأيى بعدين يالا باباى
للاسف الندوات دي او اي ندة راحت او حتيجي مش حجي ولا حشارك كل دى لاني مش مصرية مع اني من جوة مصرية طحن:)
تحياتي وبالتوفيق
ازيك يا سهى
خلاص ندوة باسم خلصت
بس لازم تيجي ندوة وقوف متكرر في ميريت الأربعاء القادم
الساعة 7
واوعي ماتجيش
Lemonada
طبعا واضح جدا انك مصرية من جوه طحن زي ما بتقولي
بس خسارة انك ما جيتيش الندوة لأنها كانت جميلة بجد
وخسارة كمان انك ما تطلعيش مصرية
بس عموما لو لم أكن مصريا لوددت أن أكون مصريا
إرسال تعليق