الجمعة، ٢٥ أبريل ٢٠٠٨



العلم "نُورُنْ"!


الأرض كروية تدور حول نفسها، والناس في مصر لا يفهمون كثيرا في علم الخرائط، أو ما يطلق عليه في المسرحيات "الفوتوغرافيا" تحريفا لـ"الجغرافية".
- يعني أنا أنام وبيتي في محافظة القاهرة، أصحى الصبح ألاقيه في محافظة حلوان؟!
على كل مواطن منا أن يضع علامة مميزة أمام بيته، وعلى طرف حذائه، لا أحد يضمن، فقد تسرح قليلا وأنت واقف في الحمام، لتنتبه وتجد نفسك في دولة أخرى.
كل شعب مطالب بأن يحافظ على محافظاته، فالمحافظات على كف عفريت، والعفريت في علبة، والعلبة على شكل لعبة، تفتحها من هذه الناحية بها 26 محافظة، ومن الناحية الأخرى بها 28، لا علاقة لهذا بالغش التجاري، لأن التجارة شطارة، والعدد في الليمون، والليمون به فيتامين "c"، والـ"c" حرف إنجليزي، والإنجليزي إيزي، والإيزي ميزي.
قررررب واتفرج، الـ 26 محافظة بـ 75 مليون مواطن، مش هنقول 80، ولا 78، ولا حتى 76، واللي ياخد 26 محافظة ياخد عليهم 2 هدية، منهم واحدة لقطة اسمها 6 أكتوبر، والتانية كويسة برضه اسمها حلوان، بس ماتنساش الشاي بتاعنا.
الرئيس مبارك يحب المحافظات، روحه فيها، لا يفضِّل محافظة على أخرى، كلهن بناته، ولهذا اختار لكل منهن عريسا يليق بها، الرئيس بيشتري رجالة، وهل هناك رجال أفضل من اللواءات، حيث الخبرة والمتانة، أي لواء يستطيع السيطرة على أي محافظة، خاصة أن المحافظات ناقصات عقل ودين، تشارك في الإضرابات، وتخرج في المظاهرات دون علم رجال البيت، وأحيانا ترفع صوتها أمام الغرباء، والرئيس لا يعجبه الحال المايل، لهذا كان لابد من لواءات حازمين، فمايو قادم، و4 منه قادم، والمحافظات في حالة استثارة، تحتاج إلى رجال حقيقين يطفئون نارها، والمحافظة التي لا تسمع الكلام حلها سهل: اكسر لها ضلع، يطلع لها 24، قول 28.
* كل ما هناك أنني أشفق بشدة على أصدقائي في المحافظتين الجديدتين، ممن فتح الله عليهم واشتروا سيارات، كل منهم سيفوز بلوحة معدنية مكتوب عليها: ملاكي 6 أكتوبر، وهذه بسيطة، إلا أن الأفدح تلك المكتوب عليها: ملاكي حلوان.. والله أحسن لهم يعزّلوا!

هناك ١٦ تعليقًا:

شادي أصلان يقول...

بحس انها حاجة مميزة اوي اني اكون اول حد يعلق علي بوست .
فكرة تغيير المحافظات دي مقلقة جدا
لدرجة اني اخشي علي نفسي منها.
تسلم دماغك يا فنان
مستني زيارتك لو امكن لمدونتي المتواضعة

m.sobhy1990@gmail.com يقول...

أنا قولت لك رأيى قبل كده يامحمد

بجد يخرب عقلك

وحلوة قوى ملاكى حلوان دى

ههههههه

أسماء علي يقول...

عمي عزب
بعد فترة ابتعاد عن مدونتك لأسباب وندوزية قاهرة
عدت
وجدت محافظتين جديدتين مكسوفتين
بس المرحومة الجيزة كده يصحى محافظها الصبح يلاقي نفسه أرمل
عارف هو لو كان شديد ماكنش بقى أرمل

المهم اللي قاعد في محافظة ياريت يتبت عليها بايديه وباسنانه
بدل ماتمشي على حل شعرها ويلاقي مالهاش اثر الصبح
معلش
لكل محافظة اجل
ولكل اجل كتاب يحدده
اصحاب الكتاب
وبقينا حكومة يديرها امن الدولة حتى في محافظينها
وده عشان الأدب فضلوه عن رغيف العيش ..

مصطفى محمد يقول...

سلامو عليكو
نياهههااههاههاهاهههه

ان اي نعم ساكن في المعادي .. ولكن انا تابع لقسم البساتييييييييين
يعني مش تبع محافظة حلوان

متتصورش انا فرحان اد ايه .. كان زماني -لو كنت تابع لقسم المعادي- في محافظة حلوان ..

قال محافظة حلوان قال

سارة درويش يقول...

برغم اعتراض كل الناس على المحافظتين الا انهم فادونى ، اه والله .. ماكنتش اعرف مصر كام محافظة ويوم ما اتغيروا عرفت .. بس سين سؤال : هى ملاكى حلون كلمة عيب ؟!! يعنى ليه عااار اوى كده انها تكون محافظة ؟!! .. ياريت تجاوبنى واعذرنى انا زى ما قلت قبل كده .. لسة خارجة طازة من الكهف

دكتور مستكنيص يقول...

ياعم انا دقهلية الحمد لله طلعت برة اللعبة دي
بس نظرا لعدالة الحكومة عملوا لنا لعبة جديدة بدل مانقعد فاضيين
نقلوا كل المواقف برة البلد فبقينا نركب مواصلتين عشان ندخل المنصورة والتاكسي اللي كان بياخد جنيه ونص بقي ياخد خمسة جنيه بالعافية ده غير ان الموقف علي الطريق السريع في عز الحر ده تحس انك في طاسة زيت
وكل ده صحينا الصبح لقيناه
ياسيدي احنا ناس تجيد تطبيق سياسة الامر الواقع والواقف والنايم كمان
تحياتي

محمد صلاح العزب يقول...

شادي الجميل
جميلة مدونتك
وبشوف شغلك فب الدستور وبيعجبني جدا
المهم انت تبع آني محافظة؟

محمد صلاح العزب يقول...

محمد صبحي
صباح الفل يا جميل
انت عارف ان كان في واحد معلق نمرة على عربيته وكاتب عليها ملاكي قريش وماشي بيها؟!

غير معرف يقول...

على فكره انا من سكان محافظة حلوان
وحلوان طول عمرها رائدة وكلها يومين ونلاقيلها عيد وطنى وعلم كمان
وبعدين دى فرصة ذهبية عشان اقول قدام العالم كله من هذا الموقع ليه دايما مش بنعترض غير لما تقع الفاس ف الراس ما هى الحكومه بقالها سنه بتقول البلد بتتحرك اللبلد بتتحرك ومحدش اتكلم فيكو ولا اعترض ولا عشان انا غلبااااااااان يعنى، على فكره يا عزب انا كان نفسى احضر التوقيع مع ديوان لكن مقدرتش والله لكنى سعيد جدا ولو كنت موجود كنت وقعت بنفسى بينك وبين ديوان والف مبروك يا حبيبى

محمد مرسى

محمد صلاح العزب يقول...

دكتورتي العزيزة
حلو قوي الشغل التفاعلي اللي بتعمليه ده
وجميلة نصوصك الموازية
بس تفتكري الأسباب الوندوزية القاهرة دي، قاهرة فعلا، ولا ممكن تطلع حلوان مثلا؟!

محمد صلاح العزب يقول...

مصطفى
ما تضحكش قوي كده
أنا معايا تليفونهم وممكن أكلمهم يعملولك محافظة لوحدك

محمد صلاح العزب يقول...

سارة الجميلة
كان في مليون طريقة عشان تعرفي عدد محافظات مصر غير كده
وإجابة سؤالك موجودة في المذكرة صفحة 11

محمد صلاح العزب يقول...

سارة الجميلة
كان في مليون طريقة عشان تعرفي عدد محافظات مصر غير كده
وإجابة سؤالك موجودة في المذكرة صفحة 11

محمد صلاح العزب يقول...

دكتور مستكنيص
احمد ربنا انهم ما نقلوش الموقف في محافظة تانية

محمد صلاح العزب يقول...

مرسي
ازيك يا زعيم
أنا شايف انها فرصة مناسبة فعلا ان أهل حلوان يفكروا يستقلوا بحكم ذاتي
هم يعني أقل من المصريين في حاجة؟!
وكأنك جيت يا باشا

سارة درويش يقول...

وإجابة سؤالك موجودة في المذكرة صفحة 11
____________
كفاية عليا المذاكرة ، بيقولوا يا خبر النهاردة بفلوس بكرة يبقى ببلاش .. هحطها جنب اختها (( توقيع الرواية )) واستنى لما ربنا يبعتلى الفرج