الأربعاء، ١٢ مارس ٢٠٠٨






اطفي النور




الخروج من الأبواب الضيقة شيء رائع.
الكل يحلم بالخروج من الأبواب الضيقة، وهو حلم مشروع وجميل، وليس على أحد جناح إذا قرر الخروج منها.
المشكلة أن هذه الخنقة تحولت إلى ظاهرة، كل ما ترى واحدا مكتئبا وتسأله:
- مالك؟
يرد عليك وقد قلب ملامح وجهه مثل قطعة قماش قديمة في مسمط:
- نفسي يا أخي أخرج من الأبواب الضيقة.
هذه الحالة العامة جعلت مطربا كبيرا مثل "محمد منير" يغني أغنيته الشهيرة: "اخرج م البيبان الحر الضيقة".
كل ما أسمع هذه الأغنية أشعر أنني أريد أن أتمشى على النيل أمام "رمسيس هيلتون" بمفردي مستمتعا للغاية بزهقي، وليس لدي أي براح نفسي أو عاطفي لأي شيء ولا حتى للنظر إلى بنت ألمانية طويلة وجذابة ترتدي ما يمكن أن نطلق عليه بنوع من المبالغة "لباس بحر".
حالة الأبواب الضيقة هذه تنتابني كثيرا خصوصا في الصيف، لكن فكرة الخروج منها لا تكون متاحة دائما، فالحياة لا تمنح الواحد منا رفاهية السير على الكورنيش 4 أو 5 مرات أسبوعيا، خصوصا أن البنت الألمانية التي لا تفرق بين شاطئ نهر وشاطئ بحر لن تكون موجودة دائما.
لكن يظل حل سحري للمشكلة لم يتوصل إليه "محمد منير"، وأقترح عليه أن يضعه في حسبانه في ألبوماته القادمة.
أول ما تنتابك حالة الأبواب الضيقة، أغلق عليك الباب من الداخل بالمفتاح جيدا (6 سَكَّات لو أمكن)، أغلق هاتفك المحمول، انزع فيشة تليفون البيت، أطفئ نور الشقة كله، اخلع ملابسك بالكامل، اصعد على السرير، تمدد على ظهرك، افرد ذراعيك على آخرهما، أفسح قليلا بين قدميك، بحيث يبدو شكلك النهائي كمصلوب ليست لديه خبرة كافية، أغمض عينيك بقوة، استرخ، لا تفكر في أي شيء، وخصوصا البنت الألمانية (من أدراك أنها ألمانية أصلا)، اصرخ بأعلى صوتك:
- يعني إيه أصلا البيبان الضيقة؟ المكان هو اللي بيبقى واسع أو ضيق، لكن البيبان مجرد ممر.. ما فيش حاجة اسمها البيبان الضيقة.
خلاص؟
يمكنك أن تضيء النور.

هناك ١٦ تعليقًا:

أسماء علي يقول...

مبدئيا كده.. هو الحتة بتاعة رمسيس هيلتون دي الشعب كله بيتمشى فيها وهو مخنوق ولا ايه؟؟
هههههههههه
انا باخد لغاية مااوصل المنيل مشي ..
بابقى عايزة اطلع من حالة الإختناق اللي صدقني بتروح مؤقتا وبس ...
بالنسبالي مش باهتم بالولد الأسمر الأمور الطويل ده (ماليش في البنات الألمان أنا)
...
المهم بعد الوصفة الرائعة اللي ف الآخر .. هل تعتقد إن حالة الضيق من البيبان المغلقة والعقدة النفسية دي هتروح؟؟
...
مااعتقدش اصل حياتنا كلها بقت باب مغلق يسيطر علينا ..
بس اللي أنا شيفاه إن البوست المرة دي بجد توووووحفة جداا ياأديبنا ..
واهه خلانا نحس إن الباب المغلق ده ظاهرة عامة مش خاصة برضه ..!
....
تحياتي ..

محمد إبراهيم محروس يقول...

بص يا عمو الحاج بقى المشكلة معددش البيبان ضيقة
الموضوع كله أن مصر كلها بقت ضيقة زي خرم الابرة
عارف احساس انك عايش جو سجن وعليه سجان بيبقى افظع بكتير من باب ضيق وباب واسع ياعمونا
وموضوع تقلع هدومك وتتمدد جربنها منفعش
وقلعنا هومنا بلبوص واتمشينا في الشقة رايح جاي برضه مفيش فايدة لا محمد منير نفع
ولا فايق العزب ههههه
قولنا نطلع البحر وننزل والدنيا بتمطر صدقني عز التلج برضه
تحس ان البحر ضاق ومش مكلف خطره يبلعك يا جميل
تصور مفكرتش في الالمان .. ولا السويسري
بس التلاجات الاديل القديمة بتاعت المصانع زي الفل.. مستورد ايه ياعمونا بس شجع صناعة بلدك
ولما البيبان تضيق الحل الوحيد بجد يعني تنام وتشخر ولو حد صحاك عوره في وشه يمكن سعتها حد يفتح لك الباب تخرج .. وأبقى قابلني لو حد خرجك هههههه
سلام يا جميل

غير معرف يقول...

بص يا عم محمد أنا أشتريت الرواية و قرأتها كلها و بصراحة أنا ما صدقت إني لأيت البلوج بتاعك عشان أقولك
بجد بجد أنا أتقرفت
إيه ده يا أخي
لو عندك وجهة نظر تانية إشرحهالنا
إنما كل الكم ده من القذارة في رواية واحدة كدة كتير أويييي
أنت موهوب جداً و أسلوبك خطير بس المحتوى مقرف مقرف جداً و لو أسلوب الكاتب رائع بس مضمون الكتابة وحش تبئي ذي قلتها
لو عندك وجهة نظر تانية قولها ربنا يسترك عشان أنا حاسس بقرف من ساعة ما قريت الرواية بتاعتك
و يا ريت نشوفك في روايات تانية أنضف و أرقى من كدة

shorouk said شروق سعيد يقول...
أزال المؤلف هذا التعليق.
محمد صلاح العزب يقول...

صديقتي الجميلة دكتورة أسماء
مبدئيا كده أنا بستمتع بتعليقاتك
ومعاكي طبعا انها مش هتروح
الحياة عبث يا دكتورة

محمد صلاح العزب يقول...

الجميل محمد
تفتكر الحل اننا نقلع هدومنا كلها ونسيبها هنا ونخرج برة مصر كما ولدتنا أمهاتنا؟؟ أحرارا يعني؟!!!

محمد صلاح العزب يقول...

الأخ غير المعرف اللي بيتعامل مع الأدب بالطريقة دي:

* بجد بجد أنا أتقرفت

* أنت موهوب جداً و أسلوبك خطير بس المحتوى مقرف مقرف جداً و لو أسلوب الكاتب رائع بس مضمون الكتابة وحش تبئي ذي قلتها

* و يا ريت نشوفك في روايات تانية أنضف و أرقى من كدة

أنصحك يا صديقي ببرسيل بـ "كرات القوة".. يغسل أكثر بياضا

مصطفى محمد يقول...

سلامو عليكو

أولا :تصدق بقيت أفرح لما أشوف بوست ليك هنا

ثانيا :كيبوردك التدويني ممتع ممتع ممتع

ثالثا :اعتب على سعادتكم في مسح التعليق اللي يبدو كده زعلك .. يا راااجل .. ده أسلوب أديب كبير حريته في كتابته فضفاضة

رابعا :أرجو اضافة اجراء لم يتم ذكره لوصفتك .. يعلم الجميع ان هناك عمارات تتجاوز في الطول عمارات أخري .. و ان كل هذه العمارات تقع بجانب بعضها .. و لو كنت في عمارة طويلة و بجانبك عمارة قصيرة .. اعلم ان هناك من على السطوح المجاور سيلفت نظره صرختك .. سينظر .. و ..
أرجو غلق النوافذ

:)

محمد صلاح العزب يقول...

صديقي الجميل مصطفى
تسعدني زيارتك جدا
موافق طبعا على الإضافة الجميلة
وبالتسبة للتعليق الممسوح
صاحب التعليق هو اللي مسحه مش أنا ومكتوب
تمت إزالة هذه الرسالة بواسطة المؤلف.
المؤلف يعني صاحب التعليق، والا انت فاكر يعني غن الأخ بلوج سبوت صاحب الموقع عارف ان انا مؤلف!!!!!!!!!
أنا لا أمسح إلا التعليقات الخارجة أو التي تتضمن سبابا مباشرا
أما الآراء المنتقده فأرحب بها
وغير المعرف الذي يتعامل مع الأدب باعتباره جلبابا أبيض اهم ما فيه طهارته خير دليل على هذا

غير معرف يقول...

جميل البوست يامحمد
بس سؤال هو مافيش جديد ولا إيه؟
علشان أنا قريت البوست ده قبل كده
ولا ياترى لسة الإحساس القديم موصول
أخيرا
والله العظيم إنت كاتب موهوب جدا
وبتسحرنى بتفاصيلك
واصل إبداعك دون التلفت للغير معروفين

سلام

محمد صلاح العزب يقول...

صديقي الجميل محمد صبحي
مش متأكد انك قريت ده قبل كده فعلا
وعموما في جديد طبعا
وربنا يخليك
وغير المعرفين أصدقاؤنا أيضا لكن لديهم مشكلاتهم التي نعذرهم بسببها
منورني يا زعيم

m.sobhy1990@gmail.com يقول...

يازعيم أنا متأكد إنى قريت البوست ده بتاريخ 23-8-2007 وإتأكد إنت وقوللى إذا كنت غلطان ولا لأ؟

سلام يامحمد

qwert anime يقول...

اانا قضيت اليوم فى مدونتك قريتها بالكامل رائعة حقا
و قد قرأت سرير الرجل الايطالى الرواية جميلة جدا و ارى انك قاص تستخدم اسلوب مميز و قدرة هائلةعلى السرد بالتوفيق

محمد صلاح العزب يقول...

محمد صبحي
ماشي يا زعيم

محمد صلاح العزب يقول...

qwert anime
ربنا يخليك

أسما عواد يقول...

انا أول مرة أزور مدونتك
اتعرفت عليها عن طريق مدونات الاصدقاء
موش عارفة اذا كنا اتقابلنا ولا لأ لكن صورتك موش غريبة عليا
البوست جميل وانا لسه مقرأتش الرواية
لحد ما اقراها
أنا حاسة انها هتكون جميلة قوي
بدعوك للإجابة على أسئلة باب الشمس
http://baabalshams.maktoobblog.com/
وكمان تبص على بلوجر
تحياتي