الخميس، ٣٠ أغسطس ٢٠٠٧

التكعيبة
تعرف أحمد ليبتون؟ تعرف أشرف ليبتون؟ تعرف أسامة؟ تعرف شارع النبراوي، المتفرع من شارع شامبليون، المتفرع من عبد الخالق ثروت، المتفرع من شارع رمسيس؟ تعرف رمسيس؟ تعرف الإسعاف؟ تعرف تدخل من جنب نقابة المحامين، وتخلي نقابة الصحفيين على شمالك وتعدي الطريق وتدخل في أول يمين؟
لو ما تعرفش أديك عرفت.
بمجرد دخولك إلى شارع شامبليون، تبقى دخلت سرة وسط البلد، خليك ماشي، هتعدي على كشري أبو طارق، مالكش دعوة بيه، خليك ماشي لحد ما تلاقي قدام شوية على اليمين قصر قديم مهجور، ادخل من الشارع اللي قبله، هتلاقي شوية ناس قاعدين على كراسي بلاستيك قديمة، ناس شعرها طويل، وهدومها مبهدلة، ناس ببدل كاملة، وحاطين على شهرهم بيريل كريم، صنايعية وبياعين، ولاد وبنات، ستات ورجالة، مصريين وأجانب وعرب، حياة تانية خالص.
اقعد استريح، الجو حر ورطوبة أنا عارف، خمس دقايق والدنيا تطري، عجبك المكان؟ لأ؟ عجبك الجو؟ مش قوي، تبقى مش فنان، يا أستاذ ركِّز لو سمحت، المكان اللي انت قاعد فيه دلوقتي ده، وعمال تتلفت حواليك وعامل نفسك من مرتادي شيراتون هليوبوليس من أهم الأماكن التاريخية في مصر (باعتبار ما سيكون)، التكعيبة مرحلة مهمة جدا في حياة أي مبدع جديد، ممكن تستمر علاقته بيها أو ما تستمرش، مش دا المهم، المهم ان كله لازم يعدي من هنا، صحفيين، ومخرجين، وكتاب، وشعرا، ورسامين، وممثلين، وفنانين من كل الأنواع، والأجناس والملل.
مالك عمال تبص حواليك كده ليه؟ همَّ دول؟ آه همَّ دول، ماتستعجلش، كلها كام سنة وكتير من الناس دول مش هتعرف تتكلم معاهم، سنين قليلة مش كتير، والصف اللي قاعد على الكراسي المعنوية في كل المجالات الفنية والثقافية هيقوم، والناس اللي قدامك دول هيقعدوا، وحتى لو القدام ما قاموش الناس الجداد دول هيشيلوا الكراسي البلاستيك بتاعتهم وهيروحوا يقولولهم اتاخروا شوية، وسعوا كده، ساعتها الجمهور هيلاقي ناس قديمة عليها تراب قاعدة على كراسي جلد فخمة، ومالهمش دعوة بيهم، وناس قاعدة على كراسي بلاستيك وعندهم حاجات حقيقية عاوزين يقولوها، ساعتها أكيد الكراسي البلاستيك هتنتصر
إلحق خد لك كرسي

هناك ٣٤ تعليقًا:

كراكيب نـهـى مـحمود يقول...

اول تعليق عن المكان قلته لسهى زكي ومحمد كمال حسن ومصطفى الحسيني
تعرفو الواحد حاسس انه قاعد في الشارع
ورد الثلاثة في نفس واحد على فكرة انتي قاعدة فعلا في الشارع
تحيا التكعيبة يا دكتور

مـحـمـد مـفـيـد يقول...

وصف رائع للمكان الساحر
تحيه لك يا محمد

fawest يقول...

اة
انت بتكلمنى
طيب سمعت
تاريخ المقاهى معروف فى الدنيا بأكملها من اول الشانزليزة الى ايزفيتش
وانا ضامن
ان بوستك دة هتكوت تاريخبا يتنبؤ
بالمكان

محمد صلاح العزب يقول...

أهلا يا ست نهى
وعندك واحد شاي ميزة لأجمد بنوته على القهوة وصلحه

soha zaky يقول...

والله يا محمد شميت رحت التفاحة وانا بقرا البوست اه ما كل واحد بقى يبص للليه فى المنطقة ، على فكرة المشكلة دائما مش فى نوع الكراسى ، المشكلة ان مفيش حد بقى يساعد حد ان يناوله كرسى او يفضيه وعلى فكرة مفيش حد يا محمد الايام دى خالص ممكن يسيب الكرةسى اللى عليه حتى لو مترب وعليه طينة ، حتى لو كان مجرد صوت من غير صورة ولا عقل ولا كيان ، مفيش حد هايسيب كرسيه لحد ، لانه ببساطه لو فكر يمشى برضه هايخده فى ايده ، المهم ان التكعيبة تفضل موجودة فى مكانها لانها مهمة جدا جدا جدا

LAMIA MAHMOUD يقول...

زمايل يعني :)
بس الشيشة تقيلة اوي هناك قلهم يخففوها

محمد صلاح العزب يقول...

محمد مفيد
أنت أروع يا صديقي

محمد صلاح العزب يقول...

فاوست
تاريخ المقاهى معروف فى الدنيا بأكملها من اول الشانزليزة الى ايزفيتش
ده حقيقي
وانا شايف ان من حقنا صنع تاريخنا الخاص من أول التكعيبة لحد منه فيه

محمد صلاح العزب يقول...

وعندك كمان شيشة تفاح من غير مبسم لأم نهنوهه

محمد صلاح العزب يقول...

لميا
ازيك
ابقي هاتي السلاكة بتاعتك معاكي

Lemonada يقول...

عارف يا محمد
المشكلة من كثر ما بزور وبلف اماكن في مصر في 4 ايام بس
مش بلحق احفظ حاجة
بس من الوصف والصورة شكلي زرت التكعيبة
مع اني مش عارفة ان اسمها كدة
وعشان اتاكد من الموضوع دة
كنت حنزل اسوان والاقصر
بس شكلي حرجع وانزل مصر للمرة المليون
اعمل اي
مصر حاجة ثانية
وكل مرة فيها حاجة جديدة
او حاجة قديمة بس ماتعرفهاش
المهم يا عم
تحياتي لوصفك و مواضيعك الرائعة
تحياتي

محمد مصطفى يقول...

يا سلام عليك
بجد فنان
و إن كنت أول ملاة روحت كنت زي الأفندي اللي كنت بتحكي عن التفاته ده
تحياتي

محمد صلاح العزب يقول...

ازيك يا ليمو
تعالي وليكي عندي واحد عنايب سكر برة

محمد صلاح العزب يقول...

مادو ازيك يا أفندي
الحياة ابسط مما هم متخلين

مَلَكة يقول...

حلوة التكعيبة بس مع احترامي وكامل تحيزي بقى الندوة الثقافية أحسن
قوللي ليه؟
عشان الندوة مفيش ادامها تاون هاوس كل ما تروحه تلاقيه مقفول:(
وإن كان الواحد برضو لازم يشيد بشوارعية التكعيبة اللي بتخليك حاسس بروح وسط البلد أكتر
عموما
انا بحجز ليا كرسي من دوقتي أهو
ادعيلي بقى وملاقيش نفسي راكنة على حتة رصيف في الآخر:)

غير معرف يقول...

يا أخي أنا باروح التكعيبة ورحت قبل كده زهرة البستان وحاجات تانية كتير ولسة زي ما انا يظهر السر مش في الكراسي ........ على فكرة واحشني

إسلام عبد المعطي

غير معرف يقول...

انت عايز تتلزق في التكعيبة ليه؟
عايز الناس تعرف انك صاحب الكتاب المهمين الي بيقعدو عليها؟
انت نكرة و الله و اغلب من الغلب

طلال فيصل يقول...

طب انا باقعد عالبورصة
ينفع؟
تحياتى لك ولسلوبك الجميل

حسن ارابيسك يقول...

شكرا
على الوصفة الجميلة دي
زي وصفة طبق اليوم
في الأخر يطلع حاجه جميلة وحلو وطعمها جنان
حاجه محتاجها
انسان
فنان
بيحب الانسان
ويحب الفنان
ويحب المكان
وتألف الأرواح

شكرا للدعوة

مصطفى محمد يقول...

أرجو الدعاء بالرحمة لمجمع عرب المعادي الذي كان يضم ست قهاوي يتناطحون في العظمة و يتسابقون في احتضان المواهب الجديدة و الفشلة الراسخون .. كان مكان بجد ما يتعوضش .. و لا أراكم الله مكروها في مقهي عزيز لديكم

كريم بهي يقول...

هتصدق لو قلتك انك كنت اول مدونة ادخلها فى حياتى
بجد والله من زمان شوية فى شهر فبراير الماضى

اما عن التكعيبة دى اول مكان ارتبطت بيه اذنى مع دخولى ساحة الابو الفكر القاهرى وياما سمعت عنها من سهى وفاوست ونائل وغيرهم
فعلا هتكون موجودة بعد كده فى تاريخ الادب والروايات القادمة والاشعار

سعيد جدا لانى بعلق عندك
واكيد هزورك على طووووووول

كريم بهي
شاعر

محمد صلاح العزب يقول...

mmmازيك يا ملكة
لو التاون هاوس هو اللي مضايقك نقفلهولك خالص
وكمان الندوة الثقافية رخمة عشان اسمها الندوة الثقافية
يعني ايه قهوة يبقى اسمها الندوة الثقافية
هو واضح ان البوست ده هيكلفني كتير
بس ممكن أعمل حسابك في واحد فيروز تفاح
شغال؟

محمد صلاح العزب يقول...

mmmازيك يا ملكة
لو التاون هاوس هو اللي مضايقك نقفلهولك خالص
وكمان الندوة الثقافية رخمة عشان اسمها الندوة الثقافية
يعني ايه قهوة يبقى اسمها الندوة الثقافية
هو واضح ان البوست ده هيكلفني كتير
بس ممكن أعمل حسابك في واحد فيروز تفاح
شغال؟

محمد صلاح العزب يقول...

الشاعر الأجمد إسلام عبد المعطي
يا زعيم انت واخد لك كرسي لوحدك على جنب محدش يقدر يزاحمك فيه
وهو ده تميزك
واحشني جدا انت وأيمن
يا ريت تسلم لي على الناس كلها

محمد صلاح العزب يقول...

الأخ غير المعرف
عندك حق أنا نفسي أكتسب شهرة من التكعيبة
ومن الناس اللي بيقعدوا هناك
خصوصا إذا كانوا عظماء زيك
وشغلهم كله مسروق

محمد صلاح العزب يقول...

طلال فيصل الجميل
يا باشا انت تقعد براحتك
نحن الذين نصنع القهوة مش الواد اللي واقف على النصبة
اعملي معاك فنجان زيادة بن تقيل

محمد صلاح العزب يقول...

أشكرك يا حسن يا أرابيسك
ومن حقك براءة اختراع انك أول واحد يشبهني بأبلة نظيرة
وما الدنيا إلا مقهى كبير

محمد صلاح العزب يقول...

الأستاذ مصطفى محمد
نشاطركم الأحزان

محمد صلاح العزب يقول...

يا أستاذ كريم أنا سعيد جدا لأنك دخلت أول مرة عندي في فبراير وعلقت عندي أول مرة في سبتمبر
لكن أنصحك تكون أكثر حسما وسرعة في اتخاذ قراراتك
سبع شهور يا راجل؟؟؟؟؟؟؟

غادة الكاميليا يقول...

من فترة حوالى أسبوع كان عندى
test
في القاهرة وبعده نزلت قابلت صديق لي وكلمنى عن التكعيبه ووصفهالى زى وصفك ليها كده تقريبا ولولا ان الوقت كان هيتأخر وأنا عندى سفر كان خدنى على هناك لأننا كنا قريبين من التكعيبه بس هى مين أنا غادة بردوا ومش هرتاح إلا لما أروحها
وعندك واحد عنّاب ساقع

غير معرف يقول...

بايخة قوي قوي
ريحة الإحساس بالنفس بشكل ساذج كده
الفكرة إنك خرجت شكل الفنانين من
واحد عنده موهبة
لواحد بروباجندي عاوز هيصة إعلامية
من كلامك عن الناس اللي انت مستهون بيهم دول بكرة مش هتعرف تتكلم معاهم
أحييييييييه
..
قريت روايتك ,, مش بطالة .. بس عادية
عادية جداً شبه التكعيبة فعلاً
...

Leila Arman يقول...

آه
بس ده ما يمنعش إنيأعترف
أنا لسه قارية سرداب طويل حالاً
وعجبتني

غير معرف يقول...

hi! [url=http://esnips.com/web/minnaregina/]Hello. And Bye.
[/url] http://esnips.com/web/minnaregina/ free nude video clips of milfs
thanks!
free nude video clips of milfs

غير معرف يقول...

http://markonzo.edu sibutramine spilling lamisil reviewgalway maintenanceo clarinex healthrisk receptacles lexapro mdgeneral prilosec preparations