اشتريته ب185 جنيه من يومين واشتريتله شاحن صيني بـ5 جنيه

المهم يكون هو مسامح في العدة

بعد انقطاع دام يومين كاملين عن الحياة استطعت استرداد شريحة لخطي القديم من شركة موبينيل بعشرة جنيهات فقط

يابلاش

لكن فضلت واقع في مشكلة العدة
الحالة كانت مقشفرة جدا.. ومافيش أي فلوس.. ولاد الحلال - وما أكثرهم - قالولي ده الموبايلات دلوقتي بتبدأ من 20 جنيه بس
قلت لو كده بسيطة خصوصا ان الواحد ما وصلش لمرحلة ان مامعهوش عشرين جنية
طب فين يا اخوانا الموبايل اللقطة أبو بريزتين ده
اخوانا ولاد الحلال اختفوا تماما
فطلعلي ولاد حلال تانيين قالوا لي عليك وعلى شارع عبد العزيز
حطيت في المحفظة 200 جنيه ورحت نازل
المبلغ الباهظ ده جالي على فجأة كده كأنه جاي علشان الموبايل مخصوص
اتمشيت في شارع أخونا عبد العزيز
الساعة كانت حوالي 11 ونص بالليل، والشارع يا مولانا ملغم أمناء شرطة، أنا قلقت وقلت المقاطيع دول بيتنشقوا على أي مصلحة
كنت متخيل ان مادام في موبيلات بعشرين جنيه يبقى أنا بالمتين جنيه بتوعي دول أقل واجب هاجيب نوكيا إن 93
بدأت أسأل في المحلات فلقيت أقل عدة ملونه ومجسمة فوق الـ 300 قلت الواحد كان لازم يجيب معاه واحد من اخوانا بتوع العشرينات عشان يعرف انه مجرد مروج إشاعات

أول ما نزلت كنت مقرر اني يا أشتري من محل يا مش هشتري
لكن شيئا فشيئا لقيت المحلات مولعة
بدأت انزل من فوق الرصيف وكل ما الاقي تلاته أربعة متجمعين على عدة أقف أبص من بعيد أشوف الأمور ماشية ازاي
كانت الأسعار جميلة جدا
لدرجة اني لقيت نوكيا 6600 ب 450 جنية بس
المهم لقيت عيل صغير كده واقف وماسك في إيده عدة سامسونج سي 100 أخت اللي فوق دي
قلت له
عاملة كام دي يا نجم
قال
اتنين وربع
قلت له
كتير
قال
دي عدة نضيفة يا زعيم.. حاجة على أبوها
بعد كده جه واحد تاني أكبر منه شويه خد العدة منه ومشي
وشاور لي بإيده اني أمشي وراه
مشيت وراه كالمنوم مغناطيسيا
قال لي
أؤمر
قلت
الأمر لله. العدة دي لازماني بس الكابتن -وأشرت على الصغير- بيقول بمتين جنيه ودول كتير عليها
فبرق بعينيه للصغير فقال
ايه يا كابتن أنا قايل لك 2 وربع
قلت كتير
طول الكلام ده وهما ممشيني وراهم لحد ما دخلوني ممر ضيق وفاضي
الكبير قال
أصل المباحث مش سايبينا نسترزق
المهم فاصلت معاه لحد ما وصلنا ل 185 جنيه
جربت العده فوجدتها بحالة كويسة
سألته
معاها حاجة.. شاحن.. سماعة.. علبة
قال لي
لأ والله يانجم بس حاجة نضيفة استعمال طبيب
اشتريت شاحن بخمسة جنيه على حسابي وجربته في العده فكان بيشحن
حطيت الشاحن في شنطتي والعدة في جيبي
وطلعت الفلوس اديتهاله ومشيت بسرعة جدا مش مصدق اني ما اتنصبش عليا في الفلوس أو عملوش عليا أي فيلم
لقيت الواد بعد كده جي جري ورايا
وبيقول
يا كابتن يا أبو قميص اسود.. يا كابتن يا بتاع الـ سي 100.. يانجم
بصيت عليه مع اني كنت لابس سويت شيرت مش قميص وكحلي مش اسود
لقيته بيقولي
مسامح في الفلوس
استغربت وهزيت له دماغي ومشيت