حد يطول يبقى باشا؟

كنت أسير مبتهجا ومنتشيا، رغم عدم وجود أي شيء يدعو للبهجة أو الانتشاء، أدندن بأغنية "مابيسألش عليا أبدا"، وأنا أسأل نفسي:
اشمعنى الأغنية دي بالذات؟
فكرت أن لدي حق في أن أسأل نفسي هذا السؤال، فهذه الأغنية لم أسمعها منذ سنوات، وليس لدي واحد ما بيسألش عليا أبدا، التأبيد هنا مسألة مرفوضة قطعا، لأن أي واحد ما بيسألش عليا أبدا، ليس له إلا ردا واحدا مأثوراعن الفنان المشهور بحكمته فريد الأطرش: "اللي ينساك انساه".
كنت أغني وأسرح بخيالي في هذه المنطقة الـ"أبيض وأسود" وأشعر أنني قديييييم جدا، أحاول أن أخشن صوتي حتى أصل لنبرة صوت كروان الإذاعة محمد عبد المطلب.
فجأة سار بجواري رجل خمسيني قصير وبدين، قال:
كل سنة وانت طيب.
استغربت منه، إلا أن حالة الانتشاء الداخلي الموجودة عندي جعلتني أعذره، قلت: هاهو إنسان آخر يشعر بحالة انتشاء فقرر أن يشرك فيها إنسانا زميلا يسير في الشارع يدندن، فكرت في المناسبة فلم أجد، قلت له:
وانت طيب يا حاج.
وواصلت: "كان بينا كلام وحديت وغرام ولا في الحواديت"، العملية داخل الأغنية في طريقها للسخونة، إلا أن الرجل مازال محافظا على خطوته بمحاذاة خطوتي:
كل سنة وانت طيب يا أستاذ.
نظرت إليه وقلت له:
عمري ما حيرته أبدا.
كرر باستفزاز:
كل سنة وانت طيب يا باشا.
أنا مش باشا يا عم.. وقلت لك كل سنة وانت طيب.. خلاص.
- ويعني هي باشا دي حاجة وحشة.. هو حد يطول يبقى باشا.. كل سنة وانت طيب بقى.
يعني ايه بقى.. وانت طيب يا سيدي.
يا أستاذ كلك ذوق.. كل سنة وانت طيب.
عاوز ايه يعني؟
والله انت وذوقك.
كان يرتدي قميصا نظيفا ومكويا ويدخن سيجارة كليوباترا ويلبس نظارة بلاستيكية مكسورة من المنتصف وملحومة، قلت له:
الله يساهلك.
هو انا بشحت.. عيب يا أستاذ ده أنا بقولك كل سنة وانت طيب.
يللا يا عم امشي من هنا.. مش هديلك حاجة ما تتعبش نفسك.
نظر إلي من فوق لتحت، وقال:
وانا عمال من الصبح أقولك كل يا أستاذ ويا بيه وكل سنة وانت طيب، خلاص يا عم كل سنة وانت مش طيب.

وانصرف.