الجمعة، 21 سبتمبر، 2007


حد يطول يبقى باشا؟



كنت أسير مبتهجا ومنتشيا، رغم عدم وجود أي شيء يدعو للبهجة أو الانتشاء، أدندن بأغنية "مابيسألش عليا أبدا"، وأنا أسأل نفسي:
اشمعنى الأغنية دي بالذات؟
فكرت أن لدي حق في أن أسأل نفسي هذا السؤال، فهذه الأغنية لم أسمعها منذ سنوات، وليس لدي واحد ما بيسألش عليا أبدا، التأبيد هنا مسألة مرفوضة قطعا، لأن أي واحد ما بيسألش عليا أبدا، ليس له إلا ردا واحدا مأثوراعن الفنان المشهور بحكمته فريد الأطرش: "اللي ينساك انساه".
كنت أغني وأسرح بخيالي في هذه المنطقة الـ"أبيض وأسود" وأشعر أنني قديييييم جدا، أحاول أن أخشن صوتي حتى أصل لنبرة صوت كروان الإذاعة محمد عبد المطلب.
فجأة سار بجواري رجل خمسيني قصير وبدين، قال:
كل سنة وانت طيب.
استغربت منه، إلا أن حالة الانتشاء الداخلي الموجودة عندي جعلتني أعذره، قلت: هاهو إنسان آخر يشعر بحالة انتشاء فقرر أن يشرك فيها إنسانا زميلا يسير في الشارع يدندن، فكرت في المناسبة فلم أجد، قلت له:
وانت طيب يا حاج.
وواصلت: "كان بينا كلام وحديت وغرام ولا في الحواديت"، العملية داخل الأغنية في طريقها للسخونة، إلا أن الرجل مازال محافظا على خطوته بمحاذاة خطوتي:
كل سنة وانت طيب يا أستاذ.
نظرت إليه وقلت له:
عمري ما حيرته أبدا.
كرر باستفزاز:
كل سنة وانت طيب يا باشا.
أنا مش باشا يا عم.. وقلت لك كل سنة وانت طيب.. خلاص.
- ويعني هي باشا دي حاجة وحشة.. هو حد يطول يبقى باشا.. كل سنة وانت طيب بقى.
يعني ايه بقى.. وانت طيب يا سيدي.
يا أستاذ كلك ذوق.. كل سنة وانت طيب.
عاوز ايه يعني؟
والله انت وذوقك.
كان يرتدي قميصا نظيفا ومكويا ويدخن سيجارة كليوباترا ويلبس نظارة بلاستيكية مكسورة من المنتصف وملحومة، قلت له:
الله يساهلك.
هو انا بشحت.. عيب يا أستاذ ده أنا بقولك كل سنة وانت طيب.
يللا يا عم امشي من هنا.. مش هديلك حاجة ما تتعبش نفسك.
نظر إلي من فوق لتحت، وقال:
وانا عمال من الصبح أقولك كل يا أستاذ ويا بيه وكل سنة وانت طيب، خلاص يا عم كل سنة وانت مش طيب.
وانصرف.

هناك 11 تعليقًا:

a7asessha3er يقول...

عارف الشحات اما يجي يكلمك قولوا انت الي باشا يا باشا

غادة الكاميليا يقول...

ههههههههههههه
والله ضحكتنى في عز خنقتى
كنت حاسه إنه هيكون شحات
بس سيبك
مبيسألش عليّ أبدا
جااامد
كل سنه وانت طيب يا أستاذ
ههههههههه

محمد صلاح العزب يقول...

أحاسيس شاعر
والله أنا غالبا لما بيقابلني شحات بعمل نفسي واحد تاني وبودي وشي الناحية التانية

محمد صلاح العزب يقول...

غادة الكاميليا
يسعدني أن أخرجك من خنقتك دائما
ولكن من يستطيع أن يخرجني أن من خنقتي؟؟؟؟؟؟؟؟؟
هذا هو السؤال

مصطفى محمد يقول...

بس كان حقك - بانتشائك الأبيض و الأسود - أن تخرج من جيبك شلناً و تدهوله و تقوله "نهارك سعيد يا خلي

عين ضيقة يقول...

بعد الشر عليك

من غير باشا ولا أستاذ ولا حاجة خالص

على فكرة صورتك اللى هنا دى حلوة جدا
هو انا مش شايفاها صورة بقدر ماانا حاساها حالة

طيب بقى
كل سنة وانت طيب ومش عايزة منك حاجة والله

محمد صلاح العزب يقول...

مصطفى محمد
والله يا زعيم أنا كان نفسي تكون معايا ساعتها وتديله انت الشلن
عشان أتفرج على اللي هيحصل فيك
وتضامنا معاك في موقف زي ده
ما كنتش هضحك أوي

محمد صلاح العزب يقول...

عين ضيقة
وانتي طيبة يا ستي
هو انا هعتبرك بتعاكسيني وهقولك شكرا

واحد عارفك كويس يقول...

اللى انا ملاحظه ان كل اللى انت كاتبهم فى قائمة اصدقائك كلهم من الكتاب
ومش شايف فيهم حد من اصدقاء الدراسة ليك
تقدر تفسر ده
ولا انا افسره

واحد عارفك كويس يقول...

على فكرة انامن زمان معجب بطموحك ككاتب
لكن الان بلومك على بعض الكتابات
وخاصة اللتى تتنصل فيها من الماضى

moodysalihamidzic يقول...

السلام عليكم
اتمنى تشاركونى
فى حملة هنكون احسن
http://hankoona7san.blogspot.com/